डॉ.राजशेखर सोलापुरे यांना बसवरत्न पुरस्कार प्रदान

लातूर - समस्त लिंगायत समाज धाराशिव जिल्हा व बसवरत्न बहुउद्देशिय सामाजिक संस्था,उमरगा यांच्या वतीने देण्यात येणारा २०२५ चा बसवरत्न पुरस्कार महात्मा बसवेश्वरांच्या विचारांचे अभ्यासक आणि बसव व्याख्याते डॉ.राजशेखर सोलापुरे यांना उमरगा येथे शुक्रवारी आंध्रप्रदेशातील श्रीशैलपीठाचे पीठाधीश डॉ.पंडीताराध्य शिवाचार्य यांच्या हस्ते प्रदान करण्यात आला.

जिल्हा परिषद विद्यालयाच्या प्रांगणात आयोजित पुरस्कार वितरण सोहळ्याच्या अध्यक्षस्थानी माजी मंत्री बसवराज पाटील मुरुमकर हे होते तर ह.भ.प. गहिनीनाथ महाराज औसेकर, आमदार प्रवीण स्वामी, बापुराव पाटील, सन्नी पाटील, शिवलिंग पतगे यांची प्रमुख उपस्थिती होती.

डॉ.राजशेखर सोलापुरे यांनी महात्मा बसवेश्वरांच्या राजकीय विचारावर पीएच.डी. केली असून आधुनिकतेचे अग्रदूत महात्मा बसवेश्वर, लिंगायत एक स्वतंत्र धर्म,बसवेश्वरी वचन साहित्य या पुस्तकासह चोवीस पुस्तकांचे लेखन व संपादन केले आहे.महाराष्ट्रातील सहा विद्यापीठांच्या विविध विषयांच्या अभ्यासक्रमात त्यांच्या अनेक पुस्तकांचा संदर्भ ग्रंथ म्हणून समावेश झाला आहे. महाराष्ट्र, कर्नाटक व तेलंगणा राज्यात त्यांनी हजारो व्याख्याने दिली आहेत. या सर्व कार्याची दखल घेऊन त्यांना बसवरत्न पुरस्कारासाठी त्यांची निवड करण्यात आली. पुरस्कार मिळाल्याबद्दल डॉ.सोलापुरे यांचे सर्व क्षेत्रातून अभिनंदन होत आहे.